Blitz

 Breaking News

Skandali seksual, Shukri Xhelili dënohet me 2 vjet e 8 muaj burg

Skandali seksual, Shukri Xhelili dënohet me 2 vjet e 8 muaj burg
January 12
15:51 2017

Nga Anduena Llabani

Ish-kryetari i Bashkisë së Dibrës, Shukri Xhelili, do të vuajë dy vjet e tetë muaj burg. Vendimi u mor sot në mesditë nga Gjykata e Krimeve të Rënda pasi ajo pranoi më parë kërkesën për gjykim të shkurtuar.

Gjykata e shpalli fajtor Xhelilin për akuzat e ngritura nga prokuroria, duke e dënuar me katër vjet burg. Por për shkak të gjykimit të shkurtuar ai përfiton uljen e 1/3 së dënimit. Ish-kryebashkiakut Xhelili do t’i mohohet edhe e drejta për pesë vjet për të ushtruar funksione publike.

Shukri Xhelili u denoncua në maj të 2016-s, në një filmim ku ish-kryebashkiaku kërkonte favore seksuale në këmbim të një vendi pune.

Kjo ishte dosja e plotë e prokurorisë në dëm të Xhelilit, që çoi edhe në dënimin prej 2 vite e 8 muajsh burg të tij:

 

DOSJA E PROKURORISË:

Në përfundim të hetimeve paraprake për këtë procedim penal kanë rezultuar të provuara rrethanat e faktit si më poshtë:

Në datën 12.05.2016, në emisionin investigativ “Të paekspozuarit” në televizionin “Ora News” janë transmetuar disa pamje filmike, në të cilat shfaqet i pandehuri Shukri Xhelili, me detyrë kryetar i Bashkisë Dibër, duke kërkuar në mënyrë të parregullt përfitime dhe favore seksuale në shkëmbim të emërimit dhe ngritjes në detyrë të punonjëses në Bashkinë Dibër, shtetases A.A.

Më konkretisht ka rezultuar se në muajin janar dhe shkurt të vitit 2016, shtetasja A.A., me banim në Dibër, ka bërë përpjekje, nëpërmjet formave të komunikimit në rrjetin social Facebook dhe më pas, me anë të telefonit celular, për të marrë kontakte me të pandehurin Shukri Xhelili, kryetar i Bashkisë Dibër, të cilit i ka prezantuar kërkesën për mundësinë e punësimit në ndonjë vend pune pranë bashkisë ose në vend pune tjetër.

I pandehuri Shukri Xhelili, me cilësinë e kryetarit të Bashkisë Dibër, fillimisht është takuar me A. dhe i ka prezantuar faktin se nuk kishte vende të lira pune, por në vijim do ta kishte parasysh kërkesën e A. duke i kërkuar asaj të mbanin kontakte me anë të rrjetit social Facebook, si dhe me anë të telefonit celular.

Pas disa takimesh, i pandehuri Shukri Xhelili, në cilësinë e kryetarit të bashkisë, i ka kërkuar Anisës që të kishin një marrëdhënie intime kundrejt mundësisë për gjetjen e një vendi pune, në Bashkinë Dibër, duke e kushtëzuar punësimin e shtetases A. A. vetëm nëse ajo pranonte të kishte një marrëdhënie intime me të pandehurin Shukri Xhelili.

Shtetasja A., e gjendur para kësaj situate, ka regjistruar bisedat me kryetarin e Bashkisë Dibër dhe e ka pranuar kushtin, por që këtë favor seksual ta pranonte pasi të punësohej.

I pandehuri Shukri Xhelili, në cilësinë e kryetarit të Bashkisë Dibër, me vendimin me nr. 25, datë 26.02.2016, ka vendosur emërimin e shtetases A. në detyrën e magazinieres pranë Qendrës Kulturore, në Bashkinë Dibër. Vendimi i emërimit të shtetases A. në pozicionin e mësipërm është marrë pa u kryer më parë ndonjë procedurë emërimi si dhe njëkohësisht pa u paraqitur ndonjë dokumentacion nga shtetasja A.

Në datën 26.02.2016, shtetasja A. është takuar me të pandehurin Shukri Xhelili në zyrën e këtij të fundit dhe ka regjistruar bisedën midis tyre. Në këtë takim, i pandehuri Shukri Xhelili ka nënshkruar vendimin e emërimit në punë dhe njëkohësisht i ka kërkuar shtetases A. që të dilnin së bashku atë ditë se ishte përgatitur për atë ditë pasi kështu e kishin lënë se ishte mprehur se kishte një farë padurimi, se akoma nuk e kishte futur në dorë, se akoma nuk kishte pasur marrëdhënie intime. Nga ana tjetër, shtetasja A. i ka thënë se do të takoheshin ditën e hënë dhe se nuk po e gënjente.

I pandehuri Shukri Xhelili ka vijuar kërkesën e tij ndaj A. për të kryer marrëdhënie intime, duke i premtuar se në vijim mund t’i gjente një vend pune më të mirë, por gjithnjë nëse ajo do të kryente më parë marrëdhënie intime.

Pas një sërë takimesh, i pandehuri Shukri Xhelili, me cilësinë e kryetarit të Bashkisë Dibër, ka lënë takim me A. në Tiranë me qëllim kryerjen e marrëdhënieve intime, kundrejt vendit të punës që i kishte ofruar më parë dhe mundësisë në rregullimin e një vendi tjetër më të mirë pune.

Në këtë mënyrë, në datën 13.04.2016 i pandehuri Shukri Xhelili është takuar me A. në Tiranë dhe pasi e ka marrë në automjetin e tij kanë shkuar në një hotel me qëllim për të kryer marrëdhënie intime. Pasi kanë shkuar në një nga hotelet e qytetit të Tiranës, i pandehuri Shukri Xhelili ka kryer veprime të drejtpërdrejta dhe ka tentuar të kryente marrëdhënie seksuale me A., e cila duke gjetur justifikime, ka mundur të dalë nga dhoma dhe të largohet nga hoteli, pa kryer marrëdhënie seksuale, me gjithë insistimin e të pandehurit Shukri Xhelili.

Shtetasja A. ka regjistruar me një telefon celular dhe me një pajisje video-regjistruese bisedat dhe veprimet e kryera nga ana e të pandehurit Shukri Xhelili. Gjatë hetimeve paraprake janë bërë kërkimet e nevojshme për të gjetur telefonin konkret celular dhe pajisjen video-regjistruese, me anë të të cilave shtetasja A. ka regjistruar bisedat dhe veprimet e kryera nga i pandehuri Shukri Xhelili. Është kryer sekuestrimi i pajisjes video-regjistruese, por nuk është bërë i mundur sekuestrimi i telefonit celular pasi shtetasja A. nuk e ka më në përdorim aparatin celular.

Në rrethanat e mësipërme, i pandehuri Shukri Xhelili, në cilësinë e kryetarit të Bashkisë Dibër, ka kërkuar drejtpërdrejt nga shtetasja A.A. përfitime të parregullta, konkretisht ka kërkuar përfitime dhe favore seksuale nga kjo shtetase, me qëllim për ta emëruar atë si punonjëse në Bashkinë Dibër, si dhe me qëllim për ta sistemuar në një vend më të mirë pune në të ardhmen.

Kërkesa për përfitime të karakterit seksual e të pandehurit Shukri Xhelili ka qenë si kusht që shtetasja A.A. të punësohej në Bashkinë Dibër dhe të emërohej më pas në ndonjë pozicion tjetër më të mirë. Përfitimet e parregullta të karakterit seksual përfshihen tërësisht në anën objektive të Nenit 260 të K.Penal, dispozitë e cila parashikon në përmbajtjen e saj “çdo lloj përfitimi të parregullt”, ku përfshihen si përfitimet materiale, përfitimet seksuale si dhe çdo lloj tjetër përfitim i parregullt.

Në rrethanat e mësipërme, i pandehuri Shukri Xhelili ka konsumuar të gjithë elementët e figurës së veprës penale “Korrupsioni pasiv i funksionarëve të lartë shtetërorë ose i të zgjedhurve vendorë”, të parashikuar nga Neni 260 i Kodit Penal. /Blitz.al/

Share