Blitz | Kliko dhe Informohu

 Lajmi Fundit

14-vjeçari i diagnostikuar me një sëmundje të rrallë i bën apel shtetit për ndihmë

April 08
14:39 2016

 

Djaloshi L. Lila ishte vetëm 6 vjeç kur familjarët vunë re se diçka nuk shkonte në shëndetin e tij. Shpesh Lila kishte debulesë në aktivitete fizike dhe lodhej shumë shpejt. Kur situata filloi të bëhej më evidente dhe fuqitë e tij filluan të binin më shpesh, prindërit vendosën ta vizitonin.

Mjekët shqiptarë që morën përsipër rastin dolën në përfundimin se djaloshi kishte hepatitin viral, si shumë fëmijë të tjerë rreth moshës së tij.

Megjithatë, edhe më pas Lila vazhdonte të kishte të njëjtën mungesë fuqie. Kur familjarët e dërguan sërish në spital, këtë herë, pas analizave të shumta, u gjend diagnoza: dermatomiozit juvenil, që është një problem shëndetësor që prek imunitetin e përgjithshëm dhe mund të përparojë deri në prekjen e organeve të brendshme. Djali i vogël u shtrua në spital për një muaj e gjysmë dhe gjithashtu nisi mjekimin. Mirëpo u vu re se përdorimi i kortizonit po e shëndoshte shumë. Të shqetësuar, prindërit e tij vendosën të kërkonin një zgjidhje për një kontroll mjekësor jashtë vendit.

Duke qenë se para 8 vitesh, Shqipëria ende nuk i kishte liberalizuar vizat me vendet e Europës, ishte shumë e vështirë që të bëhej i mundur një udhëtim jashtë vendit. Megjithatë, për të mos ndenjur duarkryq, i ati i L.Lilës, i dërgoi një mesazh ish-kryeministrit Berisha në celular dhe fati deshi që ai ta lexonte mesazhin dhe t’i mundësonte marrjen e vizës për në Itali.

Fill pas këtij momenti, djali me familjarët e tij, pasi shitën gjithçka kishin për të paguar shpenzimet e spitalit në Itali, u nisën drejt Xhenovës, ku gjendej dhe spitali që kuronte këtë sëmundje. Pas një sërë analizash dhe kontrollesh, djali qëndroi për dy javë në spital, ku faturat e shpenzimeve i tejkalonin mundësitë e familjes. Megjithatë bënë të mundur të siguronin, me kursimet e tyre, edhe për tre muaj të tjerë listën e ilaçeve që ishin jo vetëm të shumta në sasi, por edhe të shtrenjta.

Pas kthimit nga Italia, L.Lila pati përmirësime të dukshme. Në thelb të sëmundjes është kurimi i vazhdueshëm sepse nëse ky i fundit ndërpritet, atëherë gjithçka nis nga e para. Lista e ilaçeve të detyrueshme për djaloshin është e gjatë, por nuk mjafton vetëm sigurimi i tyre sepse kjo sëmundje nuk mund të ketë një recetë fikse ilaçesh, ato mund të shtohen apo hiqen në bazë të kontrolleve të cilat duhet të jenë të vazhdueshme.

Mjekët italianë kanë thënë se për rastin e L.Lilës duhen kontrolle të paktën 2 herë në vit si dhe analiza çdo 2 muaj.

Problemi është se L.Lila, tanimë në moshën 14-vjeçare, ka 3 vite që nuk bën asnjë kontroll sepse familja nuk ia siguron dot këtë. Me anë të kërkesave të vazhdueshme  ata marrin vetëm një shumë prej 90 mijë lekësh të vjetra, që sipas familjarëve nuk mjafton as për blerjen e kortizonit për një muaj.

Ekziston një zgjidhje e përhershme e këtij problemi nëse bëhet blerja e ilaçeve imunoglobinë dhe një trajtim 6- mujor, i cili është i shpejtë dhe i efektshëm. Por këtë familjarët nuk mund ta paguajnë sepse fatura e këtij trajtimi është shumë e lartë.

Familjarët e L.Lilës kërkojnë nga shteti të paktën t’i sigurojë ilaçet dhe dy kontrollet e detyrueshme në Itali që djalit i duhen patjetër. Ata shtojnë se janë munduar shumë të marrin fonde nga organizata vullnetare, por nuk kanë mundur pasi këto të fundit kujdesen më së tepërmi për sëmundje të njohura, si leucemia apo të ngjashme me të.

Blitz.al, duke u sensibilizuar me rastin e shpjeguar më sipër, u kërkon institucioneve përkatëse të shëndetësisë apo edhe shtetasve që duan të kontribuojnë në shërimin e L.Lilës, të kontaktojnë për t’i ardhur në ndihmë familjes së tij.

 

Shperndaje