Blitz | Kliko dhe Informohu

 Lajmi Fundit

A të kujtohem unë?

A të kujtohem unë?
February 09
19:00 2017

Nga Desantila Vatnikaj 

 

Përshëndetje!

Më mban mend?

Dikur isha mendimi yt.

Dikur dëgjonim të njëjtat këngë, u mësuam të ndjekim hapat e njëri-tjetrit në vallëzime prekjesh. Mësuam se kemi shije të ndryshme për muzikën, për pijet, për filmat, për pikturat, përfunduam edhe në shije të ndryshme për njerëzit…

Në kapituj të vegjël shkruam histori të gjata, në fjali të shkurtra zgjatëm jetën.

As vetë nuk e dinim që do të duheshim kaq fort për t’u zhdukur aq lehtë prej njëri-tjetrit.

Mbaj mend një të hënë që u zgjova para teje e nxitoja të bëhesha gati e ndërkohë që mbërtheja vathët përballë pasqyrës, prekja jote në bel me lutjen “qëndro edhe pak”, më ktheu një stuhi kujtimesh.  Nuk u kisha rezistuar kurrë mëngjeseve të tilla, ishin pikërisht çfarë kisha dashur përpara se të të njihja. Me mendje i pata thurur ëndrrat veshur me zgjimin tënd, nuk hezitoja të hiqja dorë nga një ditë pune vetëm për të qenë aty ku mendoja se koha më e mirë ishte pranë teje dhe duke e zhveshur xhaketën e pendimit, të humbisja në rrugën tënde duke pëshpëritur: S’e di a ka mjaftueshëm nesër për gjërat që i dua me ty!

Fragmentet e jetës që zgjodhëm t’i rrugëtojmë të dy më çuan në një botë ku pafundësia do ma kish zili frymën. Përqafova fort atë çfarë ishe ti në atë moment, veten fillova ta dua më shumë, gjurmët nuk m’u fshinë se s’mbajti më vend kujtimi, por çdo histori jepte më shumë peshë se tjetra; i rënduam emocionet, vetëm ajër dhe kohë për të të dashur më shumë, kaq më duhej!

Të kujtohet kur qeshja me shpirt kur batutat e tua ishin më të forta se një gudulisje? Kur nuk largohesha prej teje pa më puthur? Lozonjare ndërkohë që zgjidhja një ëmbëlsirë; tekanjoze për një restorant; e dashur, e dashur deri në palcë me ty. Të kujtohet kur ishim dy? E më thoshe: Si kam jetuar pa ty? Kur në portofol mbanim fotot e njëri-tjetrit e nuk hezitonim t’ua tregonim miqve?

Do të doja të gjeja një mënyrë tjetër për ta thjeshtuar kohën time, jo duke e komplikuar me ty. Kam filluar një jetë të vjetër me gjëra të reja. Sepse ti e di, unë nuk do t’i bëja të gjitha njësoj.

Më thuaj, e kujton ditëlindjen time? Po përvjetoret tona të janë bërë akoma një ditë e zakonshme? Premtimet që më bëre a janë veshur ende me vrullin e përditshmërisë, apo i mban peng?

Dua të besoj se sot ke dikë që e do, që mes jush të ketë reaksion kimik që në përfundim ju bën të ndryshueshëm, se plagët që të kam lënë janë shumë të papërpunuara që të rrezikojnë të biesh  përsëri. Unë nuk besoj se më ke harruar, ne thjesht nuk kemi më rëndësi për njëri-tjetrin. Unë e di se dashuria nuk është e përdorshme… Pyes veten dhe ndoshta shpresoj se në qoftë se ne ndonjëherë, vetëm për të detyruar veten, do të mundemi të harrojmë…

A i mban mend të gjitha? Të kujtohem kur më doje? E mban mend si ishte të mos kishe një zemër të thyer? Kur përgjigjeshim me fjalën “patjetër shpirt”…

U mësuam keq me të qenit dy!

Dy njerëz të paplotësuar që visheshin në një të vetme.

Dy njerëz të vetëm që mbetën pa plotësuar.

Komento
Shperndaje