Blitz | Kliko dhe Informohu

 Lajmi Fundit

Kapet grabitësi i karburanteve, punonjës i Gardës së Republikës

Kapet grabitësi i karburanteve, punonjës i Gardës së Republikës
October 18
09:50 2016

Nga Anduena Llabani

Gardisti që u vu në prangat e policisë pas akuzave për vjedhje të disa karburanteve ishte punonjës i Gardës së Republikës. Duke përfituar nga ky rol, ai i kalonte postblloqet pa problem. Në reagimin e saj, garda ka bërë me dije se Geraldo Guci, 21 vjeç, ishte punonjës në provë në godinën e parlamentit dhe ende nuk i ishte dhënë arma e shërbimit.

Njoftimi i plotë i policisë

Më 18.10.2016, specialistët e Komisariatit të Policisë Nr. 2 bënë të mundur finalizimin e operacionit “Grabitësi”, ku u bë i mundur ndalimi i shtetasit Geraldo Guci, 21 vjeç, banues në Tiranë, me detyrë punonjës i Gardës së Republikës.

Shtetasi i lartpërmendur, pasi linte mjetin e tij në një distancë të konsiderueshme dhe kontrollonte me kujdes territorin, bënte goditjet në karburant. Shumën monetare të marrë në karburante dhe armën e zjarrit së bashku me veshjen i vendoste në brendësi të sediljes së mjetit të tij tip “Mercedes Benz”, për t’iu shmangur pikave të kontrollit.

Ky shtetas rezulton të jetë autor i dyshuar i disa vjedhjeve me armë të disa karburanteve në Tiranë dhe konkretisht:

  1. Në datën 16.10.2016, në rrugën “Isuf Elezi”, Selitë, është vjedhur nëpërmjet kërcënimit të armës një pikë karburanti, ku janë marrë 8.000 lekë dhe një aparat telefonik “iPhone”.
  2. Në datën 12.10.2016, në rrugën “Isuf Elezi”, Selitë, është vjedhur nëpërmjet kërcënimit të armës, një pikë karburanti, ku janë marrë 15.000 lekë.
  3. Në datën 09.10.2016, në rrugën “Teodor Keko”, është vjedhur nëpërmjet kërcënimit të armës, një pikë karburanti, ku janë marrë 20.000 lekë.
  4. Në datën 03.09.2016, në rrugën “Myslym Shyri”, është vjedhur nëpërmjet kërcënimit të armës, një pikë karburanti, ku janë marrë 40.000 lekë.

Në cilësinë e provës materiale janë sekuestruar: 1. një aparat telefonik i tipit “iPhone 6”, i vjedhur më datë 16.10.2016, shtetasit H.S; 2. një automjet i tipit “Mercedes Benz”, TR8483P, në pronësi të shtetasit Geraldo Guci, në brendësi të së cilës u gjetën: tri gëzhoja pistolete model 54; dy fishekë automatiku model 56.

Materialet procedurale iu kaluan Prokurorisë pranë Gjykatës së Shkallës së Parë Tiranë për veprat penale të “Vjedhja me armë” dhe “Prodhimi dhe mbajtja pa leje e armëve luftarake dhe e municionit”, parashikuar nga Nenet 140 dhe 278/2 të Kodit Penal.

/Blitz.al/

 

Etiketimet
Shperndaje